Aral Mula sa Kawan ng Gansa (Goose)

Nakakatuwang pagmasdan ang kawan ng Gansa na lumilipad sa himpapawid. Lumilipad sila ng isang kawan, magkakasama at magkakaagapay. Habang ikinakampay nila ang kanilang pakpak lumilikha sila ng pwersa para paunlarin at palawigin ang paglipad ng mga kasamang gansa. Sa pamamagitan ng paglipad ng kawan at pagbuo ng V formation, ang buong kawan ay nagdaragdag ng 71 porsyento higit sa paglipad kumpara sa isang gansa o ibon na lumilipad ng mag-isa. Tulad ng kawan ng Gansa kung magkakaroon lamang tayo ng iisang direksyon at pagkakaisa maaaari nating marating ang ating patutunguhan ng mas mabilis at madali dahil sa pagtitiwala sa lakas at kakayanan ng bawat isa.

Kung sakaling ang isang Gansa ay mawawala sa V formation, makakaramdam sya ng panghihina dahil sa paglipad magisa kaya pipilitin nyang bumalik sa kawan ng mga Gansa na naka V formation. Kung magagaya natin ang ugaling ito ng mga Gansa, pipilitin nating sumama sa mga taong may direksyon at alam ang patutunguhan. Handang magbigay o makibahagi ng ating talino at lakas para sa iisang patutunguhan at tagumpay.

Kung ang nauunang Gansa ay napagod sa pagiging giya o lider, aalis sya sa pwesto sa unahan at may papalit na Gansa sa kanya upang akuin ang kanyang pwesto. Ito ang magsisilbing bagong giya o lider na nasa unahan. Kung ang bawat ay isa ay may malasakit at handang umako ng responsibilidad, mas magiging madali ang ating mga gawain. Sa kabilang dako ang mga Gansa na nasa V formation lalo na yung nasa bandang hulihan ay nagbibigay mensahe pampalakas loob sa pamamagitan ng pag quack quack. Katulad ng Gansa ganun rin ang tao. Subalit sana kung tayo ay magsasalita ito ay makakatulong at makakapagpalakas ng loob.

Kung ang isang Gansa ay nagkasakit o nasugatan, dalawang Gansa ang aalis sa V formation at susundan ang nadisgrasyang Gansa. Sasamahan nila ito sa ibaba hanggang ito ay gumaling o tuluyan ng mamatay. Dito pa lang aalis ang dalawang Gansa para bumalik sa inalisang V formation o gumawa ng ibang V formation kung sakaling hindi na nila mahabol ang nauna. Gayahin sana natin ang ugaling ito ng mga Gansa. Samahan at damayan ang ating kapwa na nasa hindi magandang kalagayan. Katulad ng pagsama natin sa kanila sa magagandang panahon at kalagayan. Panatilihin natin ang pagkakaisa o teamwork tulad ng mga Gansa na nasa V formation. Dumamay tayo sa ating kapwa na nangangailangan.

Ang pinakamagandang tagumpay ay hindi napagtatagumpayan ng iisang tao lamang kundi ng samahan o grupo ng tao na may magandang pananaw sa buhay, may pagmamalasakit, handang magsakripisyo, at handang magbahagi ng talino at lakas. Sila yung mga taong nagkakaisa sa iisang direksyon at isang adhikain sa buhay. Na hindi iniisip ang pansarili lamang kundi ang makakabuti para sa lahat.