Ang Guya at Ang Balon

Minsan may isang Guya (batang baka) na naglalaro malapit sa isang balon. Sa paglalaro ng Guya ay nahulog sya sa isang malalim na balon na nooy nakakaranas na ng pagkatuyo o paghina ng balong ng tubig. Kalahating katawan ng Guya ay nakalubog sa tubig. Alam nya na sa pagkakataong iyon na malabo na syang makaahon kung sa pansariling kakayahan lamang ang paraan. Sinubukan nyang humingi ng saklolo at baka marinig sya ng kanyang amo. Umunga sya ng umunga. Agad naman syang narinig at dumating ang kanyang amo. Nagulat ang kanyang Amo sa nakita. Nagisip ng paraan ang Amo kung paano sya sasagipin. Maghuhulog ba ng lubid ngunit paano maitatali sa Guya ang lubid sa kabilang dulo. Bababa ba sa balon pero paano nya mabubuhat o maiaahon ang Guya. Sa wakas nakapag desisyon ang Amo. Isasakripisyo na nya ang Guya at Balon. Dahil hindi na nya kayang sagipin ang Guya, ililibing na nya ito ng buhay sa balong nanunuyo na rin naman. Kumuha sya ng pala at unti unti tinabunan ng lupa ang balon.
Sa pagkakataong ito, naramdaman ng Guya na wala ng pagasa na sya ay maligtas. Unti- unti na syang tinatabunan ng lupa ng kanyang Amo at nililibing na sya ng buhay. Nanalangin ang Guya at pagkatapos noon ay bigla syang nagkalakas ng loob. Inisip nya na tatabunan na rin naman sya, bakit hindi pa sya magsapalaran. Inisip nya na bawat lupang ibabagsak sa katawan nya ay ipapagpag na lang nya. At noong oras na yun, ipinagpag nya ang kanyang katawan para maalis ang lupang nakatabon. Bawat lupang bumagsak sa kanyang katawan ay naipagpag at nagsilbing tuntungan para makaakyat sa balon. Sa wakas napuno ng lupa ang balon at sya ay nakaahon.

Sana maging ganito ang ating pananaw sa buhay. Madalas ang mga inaasahan nating tutulong sa atin ay sila pang nagpapahamak at umaapak sa atin. Sila pa ang nagtatabon ng lupa at naglilibing sa atin. Ganunpaman, huwag tayong mawalan ng pag asa. Isipin natin na lahat ng problema ay may katapusan. Bawat problema ay ating ipagpag at gamiting tuntungan para sa ating tagumpay.